هل ممكن ابقي عصفور ؟
سؤال فى عقلي من أيام سؤال بفكر فيه واجيبه يمين واجيبه شمال
سؤال قد يكون غريب بالنسبة لكم واكيد فى ذهنكم سؤال عن الاسباب والرغبة فى التحول الى نوع اخر غير البشر.
وهقول لكم فعلا فى سبب لان كل شئ له سبب بس اسمع منكم الاول تتوقوعوا ايه الاسباب
-أظن نفسك تبقي زى العصفور تطري وتروحى كل مكان من غير حدود ولا عوائق
بصراحة مش هقدر انكر ده جميل وان لحظات بحلم اطير من غير قيود زى العصفور بس مش ده السبب الرئيسي فى الموضوع.
-يمكن عاوزة تبقي زى العصفور علشان هو كائن صغير جميل سعيد وصوته حلو
مين منا مايتمناش يبقي جميل سعيد وطول النهار بيغرد ويغنى بس بردو ده مش السبب مع انك قربت من السبب
طيب مش هتعبكم كتير بس
عمركم راقبتو عصفور قبل كده؟
من يومين وقف على شباكي عصفور جميل وطلع العصفور ده اكثر فهما منى تخيلو!!!
وعلمنى درس خلانى اتمنى واقول نفسي ابقى عصفور
العصفور الجميل حط رحالة على شباكى والدنيا كانت بدري والشارع فاضى والناس نايمة وكان استاذنا العصفور واقف لوحده من غير اصحابه العصافير
وبدأ يغرد ويغنى وقفت اسمع واستمتع بصوته وغناه وطبعا من غير مايشوفنى او حتى يحس
لانه كان بسرعة هيخاف ويطيربس مش عارفة عقلي قالى ياترى العصفور ده لوحدة بيغنى لمين؟
الشارع فاضى واصحابه العصافير مش جنبه
وبعد ماغلب عقلي الصغير فى فهم العصفور
قررت قرار خطير وخطوة جرئية وهى
انى اسائلالعصفور
وناديته يا استاذ عصفور اول ماسمع صوتى سكت وبسرعة كان هيطير
قلت له لا استنى متخفش
انا بس عندى سؤال انت واقف لوحدك وبتغنى ياتري بتغنى لمين يا استاذ عصفور؟
بص ليا العصفور وهو مندهش من سؤالى
-بردو يابنى البشر هتفضلو كده مش فاهمين
-طيب ممكن تفهمنى يا استاذ عصفور
-حاضر حاضر انا عصفور ربنا خلقنى علشان اكون لحن اكون اغنية فى الطبيعة ده شغلى وانا بعمل شغلى من غير ما ادور مين هيسمع او مين هيمدح او هيعجب
انا كل الى عليا انى اغنى واعمل شغلى يوصل مين ده على الى خلقنى انا اشغل نفسي بس بالى عليا والى على الله ده انا مبفكرش فيه
-احرجتنى وعلمتنى يا استاذ عصفور شكرا
ودخلت
وطار العصفور
وقلت فى بالى ياه فهمها العصفور
وطلع السؤال
هل ينفع ابقي عصفور
اشغل نفسي بدورى وعملى واسيب النتيجة وتوصيل العمل لله
هل ينفع ابقي عصفور فهم التوكل وطبقه
وقررت انى ان شاء الله هبقي عصفور متوكل بيعمل الى عليه ويسيب الباقى على خالقه هو يوصل صوته ويجزيه على عمله مش هستنى تانى ادور على الى يسمع غناي قبل ما اغنى ......
هل ممكن نبقي عصافير؟
